சட்டசபையில் ஆபாச வீடியோ:முதல்வர் சதானந்த கவுடா ராஜினாமா மிரட்டல்!

பெங்களூர்:கர்நாடகா சட்டப் பேரவையில்
நிகழ்ச்சிகள் நடந்துக்கொண்டிருக்கும் வேளையில் செல்ஃபோனில் ஆபாச வீடியோவை
பார்த்த 3 அமைச்சர்கள் பதவி விலகிய சம்பவத்தில் விசாரணை நடத்துவதற்கான
சட்டப்பேரவை விசாரணை குழு குறித்து இதுவரை முடிவாகவில்லை.

பதவி விலகிய 3 அமைச்சர்களையும் பாதுகாக்க
திட்டமிடும் பா.ஜ.க தலைமையின் நடவடிக்கையில் எதிர்ப்பு தெரிவித்து முதல்வர்
சதானந்த கவுடா, பதவி விலகப்போவதாக மிரட்டல் விடுத்துள்ளதாக
கருதப்படுகிறது.

செல்ஃபோனில் ஆபாச படம் பார்த்தது தொடர்பாக
குற்றம் சாட்டப்பட்டுள்ள 3 பேரும் எம்.எல்.ஏ பதவிகளையும் ராஜினாமா
செய்யவேண்டும் என்பது கவுடாவின் கோரிக்கையாகும். ஆனால், பதவி விலகிய 3
அமைச்சர்களுக்கும் காரணம் கேட்டு அனுப்பப்பட்டுள்ள நோட்டீஸிற்கு பதில்
கிடைத்த பிறகே சட்டசபை விசாரணை குழுவை நியமிக்கவேண்டும் என்பது சபாநாயகர்
போபய்யாவின் கருத்தாகும். இம்மாதம் 13-ஆம் தேதிக்குள் 3 பேரும் பதில்
அளிக்கவேண்டும்.

முன்னாள் அமைச்சர்களின் ஒழுக்கச்சீரழிவை ராஜினாமாவோடு ஒதுக்கிவிடலாம் என பா.ஜ.க திட்டமிடுகிறது.