இடதுசாரி தீவிரவாதமே வன்முறை மிகுந்தது: ப.சிதம்பரம்

இந்தியாவிலேயே வன்முறை மிகுந்த இயக்கம் என்றால், அது இடதுசாரி
தீவிரவாதம் தான் என்று மத்திய உள்துறை அமைச்சர் ப.சிதம்பரம் கூறியுள்ளார். மாவோயிஸ்ட் பாதிப்புள்ள 60 மாவட்டங்களில் கலெக்டர்கள் பங்கேற்ற
பயிலரங்கத்தில் இந்தக் கருத்தைத் தெரிவித்த அவர், " மாநில அரசின் சுமைகளை
மத்திய அரசிடம் ஒப்படைத்துவிடுவது சரியல்ல.

இடதுசாரி தீவிரவாதத்தால் பாதிக்கப்பட்ட மாவட்டங்களின் பிரச்னைகளை
எதிர்கொள்ள வேண்டிய பொறுப்பு, அவற்றின் மாநில அரசுகளிடம் தான் இருக்க
வேண்டும். இதையே உச்சபட்ச ஆய்வுகள் கூறுகின்றன.

இத்தகைய பிரச்னைகளை நேரடியாக சமாளிக்கும் வகையில் மத்திய அரசிடம் மனிதவளம்
இல்லை. அதேவேளையில், இந்த விஷயங்களில் உதவிட மட்டுமே முடியும்.

பாதிக்கப்பட்ட பகுதிகளில் சட்டம் - ஒழுங்கை காப்பதுடன், அப்பகுதி மக்களின் மனங்களை வெல்ல வேண்டியதும் அவசியம்.

மாவோயிஸ்ட் தீவிரவாதத்தை ஒழிப்பதற்கு மத்திய அரசு உரிய உதவிகளைச் செய்யும்.
மாநில அரசுகள் தான் முழுவீச்சில் செயல்பட வேண்டும்," என்றார் ப.சிதம்பரம்.

டெல்லியில் நடைபெற்ற இந்தப் பயிலரங்கில், மாவோயிஸ்ட் பாதித்த பகுதிகளில்
ஊரக வளர்ச்சித் திட்டங்களை மிகச் சிறப்பாக நடைமுறைப்படுத்தி, முன்னேற்ற
வியூகங்களை வகுப்பது குறித்து விவரிக்கப்பட்டது.